(க.சிவலிங்கமூர்த்தி)
பௌத்த மரபுரிமைகளையும் தொல்பொருள் பெறுமதிகளையும் பாதுகாத்து அநுராதபுரம் புனிதப் பிரதேசத்தை அபிவிருத்தி செய்வதற்கு மாநாயக்க தேரர்கள் எதிர்ப்புத் தெரிவிக்கவில்லை. புனிதப் பிரதேசத்தில் இராமர் கோயில் அமைப்பதற்கான எந்தவொரு திட்டமும் இல்லையென ஜனாதிபதியின் பணிக்குழாம் பிரதானி பிரபாத் சந்திரகீர்த்தி தெரிவித்துள்ளார்.
ஜனாதிபதியினால் நியமிக்கப்பட்ட முன்மொழியப்பட்ட அநுராதபுரம் புனிதப் பிரதேச அபிவிருத்தித் திட்டம் தொடர்பான ஜனாதிபதி ஆலோசனைக் குழுவின் இணைத் தலைவரும், ஜனாதிபதியின் பணிக்குழாம் பிரதானியுமான பிரபாத் சந்திரகீர்த்தி உள்ளிட்ட அதிகாரிகள் குழுவினர் நேற்று வெள்ளிக்கிழமை (20) கண்டிக்கு விஜயம் செய்து அஸ்கிரிய மற்றும் மல்வத்து பீடங்களின் மாநாயக்க தேரர்களைச் சந்தித்துக் கலந்துரையாடினர்.
முதலில் மல்வத்து மகா விகாரைக்குச் சென்ற அதிகாரிகள் குழுவினர், மல்வத்து பீடத்தின் மாநாயக்க தேரர் திப்பட்டுவாவே ஸ்ரீ சுமங்கல தேரரைச் சந்தித்து அபிவிருத்தித் திட்டம் தொடர்பில் விளக்கமளித்தனர்.
அதனைத் தொடர்ந்து அஸ்கிரிய மகா விகாரைக்குச் சென்ற அதிகாரிகள், அஸ்கிரிய பீடத்தின் மாநாயக்க தேரர் வரகாகொட ஸ்ரீ ஞானரதன தேரரையும் சந்தித்துக் கலந்துரையாடினர்.
அநுராதபுரம் புனிதப் பிரதேசத்தின் தொல்பொருள் பெறுமதிகள் மற்றும் பௌத்த மரபுரிமைகள் பாதுகாக்கப்படும் வகையில் அபிவிருத்திப் பணிகளை முன்னெடுப்பது தொடர்பில் மாநாயக்க தேரர்கள் கவனம் செலுத்தியுள்ளனர்.
அத்துடன், அநுராதபுரம் அட்டமஸ்தானங்களைத் தரிசிப்பதற்காக நாளாந்தம் வருகை தரும் உபாசகர்கள் மற்றும் உபாசகைகளுக்குத் தேவையான அடிப்படை வசதிகளை மேம்படுத்துவது குறித்தும் கலந்துரையாடப்பட்டுள்ளது.
குறிப்பாக, பக்தர்களுக்கான சுகாதார வசதிகள், போக்குவரத்து ஏற்பாடுகள் உள்ளிட்ட அடிப்படை உட்கட்டமைப்பு வசதிகளை ஏற்படுத்திக் கொடுப்பதன் அவசியம் தொடர்பில் கவனம் செலுத்தப்பட்டுள்ளது.
மேலும், புனிதப் பிரதேசத்தின் வரலாற்று மற்றும் சமய முக்கியத்துவத்தைப் பாதிக்காத வகையில் அனைத்து அபிவிருத்திச் செயற்பாடுகளும் முன்னெடுக்கப்பட வேண்டுமென மாநாயக்க தேரர்கள் வலியுறுத்தியுள்ளனர்.
இதன்போது கருத்துத் தெரிவித்த அஸ்கிரிய பீடத்தின் அனுநாயக்கர் நாரம்பனாவே ஆனந்த தேரர்,
இவ்வாறானதொரு உணர்வுபூர்வமான விடயம் தொடர்பில் மகாநாயக்க தேரர்களுக்கு விளக்கமளிப்பதற்காக அதிகாரிகள் வருகை தந்தமை வரவேற்கத்தக்கது. அநுராதபுரம் புனிதப் பிரதேசத்தின் மேல் மாளிகைப் பகுதியில் எவ்விதமான நடவடிக்கைகளும் இடம்பெறவில்லை. மணல் முற்றங்களிலும் அவ்வாறான நடவடிக்கைகள் இடம்பெறவில்லை.
இவ்வாறான சம்பவங்கள் தொடர்பில் சமூகத்துக்கு உரிய முறையில் தெளிவுபடுத்தப்பட வேண்டும். ஒவ்வொரு கட்டமாகவும் மக்களுக்கு விளக்கமளித்து, சம்பந்தப்பட்ட தரப்பினருடன் கலந்துரையாடி நடவடிக்கைகளை முன்னெடுத்திருந்தால், தற்போதைய சர்ச்சைகளில் பெரும்பாலானவற்றைத் தவிர்த்திருக்க முடியும். உணர்வுபூர்வமான விடயங்களில் கலந்துரையாடல் மற்றும் இணக்கப்பாட்டின் அடிப்படையில் செயற்படுவதே மிகவும் பொருத்தமானது எனத் தெரிவித்தார்.
ஜனாதிபதியின் பணிக்குழாம் பிரதானி பிரபாத் சந்திரகீர்த்தி ஊடகங்களுக்குக் கருத்துத் தெரிவிக்கையில்,
அநுராதபுரம் தொல்பொருள் பிரதேசத்தில் எந்தவொரு ராமர் கோயிலையும் நிர்மாணிப்பதற்கான திட்டம் எதுவும் இல்லை. அவ்வாறான தகவல்கள் முற்றிலும் தவறானவையாகும். இம்முறை வரவு செலவுத் திட்டத்தில் அநுராதபுரம் புனிதப் பிரதேசத்தின் அபிவிருத்திப் பணிகளுக்காக ஜனாதிபதி 500 மில்லியன் ரூபாவை ஒதுக்கியுள்ளார்.
அதேபோன்று, இந்திய அரசாங்கத்தின் ஊடாக ஏதேனும் வகையில் நிதியுதவியைப் பெற்றுக்கொள்ள முடியுமாயின் அதனைப் பெற்றுக்கொள்வதற்கும் எதிர்ப்பில்லை என்ற நிலைப்பாட்டை மாநாயக்க தேரர் வெளிப்படுத்தினார்.
இந்தியப் பிரதமர் நரேந்திர மோடி பௌத்த மதத்தின் மீது மிகுந்த பற்றும் ஈடுபாடும் கொண்டவர் என்பதால், இந்திய அரசாங்கத்தின் உதவியைப் பெற்று அநுராதபுரம் புனிதப் பிரதேசத்தை அபிவிருத்தி செய்வதில் தமக்கு ஆட்சேபனை இல்லை எனவும் மாநாயக்க தேரர் தெரிவித்தார்.
பௌத்த மரபுரிமைகளையும் தொல்பொருள் பெறுமதிகளையும் பாதுகாப்பதுடன், புனிதப் பிரதேசத்துக்கு வழிபாட்டுக்காக வருகை தரும் பக்தர்களுக்குத் தேவையான வசதிகளை மேம்படுத்துவதே அபிவிருத்தித் திட்டத்தின் நோக்கமாகும் என்றார்.
