ஊழல், பிளவு மற்றும் அரசியல் பொய்களுக்குக் கிடைத்த தோல்வி' - லூலாவின் 4 ஆவது வெற்றிக்கு ஜனாதிபதி அநுரகுமார வாழ்த்து!
பிரேசிலின் நான்காவது முறையாகத் தெரிவு செய்யப்பட்டுள்ள
Monday, October 26, 2026
கெஹெலியவுக்கு பிணை – வெளிநாடு செல்ல தடை!
தரமற்ற மருந்துகள் இறக்குமதி செய்யப்பட்ட விவகாரத்தில், நீதிமன்றம் உத்தரவிட்ட முழுமையான இழப்பீட்டைச் செலுத்தத் தவறிய முன்னாள் அமைச்சர் கெஹெலிய ரம்புக்வெல்ல உள்ளிட்ட நான்கு பிரதிவாதிகளையும் பிணையில் விடுவிக்க உயர் நீதிமன்றம் உத்தரவிட்டுள்ளது.
அத்துடன், குறித்த நால்வரும் வெளிநாடு செல்வதற்கும் நீதிமன்றம் தடை விதித்துள்ளது.
முந்தைய அரசாங்கத்தின் ஆட்சிக்காலத்தில் தரமற்ற மருந்துகள் இறக்குமதி செய்யப்பட்டதன் மூலம் அடிப்படை மனித உரிமைகள் மீறப்பட்டதாகத் தீர்ப்பளித்த உயர் நீதிமன்றம், இவ்வழக்கில் பிரதிவாதிகளாகப் பெயரிடப்பட்டிருந்த ஐவருக்கும் கடந்த மார்ச் மாதம் இழப்பீடு செலுத்த உத்தரவிட்டிருந்தது.
இதன்படி, முன்னாள் அமைச்சர் கெஹெலிய ரம்புக்வெல்லவுக்கு 75 மில்லியன் ரூபா இழப்பீடு செலுத்த உத்தரவிடப்பட்டிருந்த நிலையில், அதில் 20 மில்லியன் ரூபா ஏற்கனவே செலுத்தப்பட்டுள்ளதாக அவரது சட்டத்தரணி நீதிமன்றத்தில் தெரிவித்துள்ளார்.
இழப்பீட்டை உரிய முறையில் செலுத்தத் தவறியதன் மூலம் நீதிமன்ற அவமதிப்பு இடம்பெற்றுள்ளதாகக் குற்றஞ்சாட்டி தாக்கல் செய்த மனுவைப் பரிசீலித்த பின்னரே இந்த உத்தரவு பிறப்பிக்கப்பட்டுள்ளது.
தலைமை நீதியரசர் பிரீத்தி பத்மன் சுரசேன தலைமையிலான மூவரடங்கிய உயர் நீதிமன்ற நீதியரசர்கள் அமர்வு இந்த உத்தரவைப் பிறப்பித்துள்ளது.
BREAKING | பரபரப்பான பிரேசில் அதிபர் தேர்தல்.. ஆட்சியை தக்க வைத்தார் இடதுசாரி தலைவர் லுலா!
#BREAKING | பரபரப்பான பிரேசில் அதிபர் தேர்தல்..
அஹங்கமவில் வாகன விபத்து: 5 பேர் காயம்
அஹங்கம, கதலுவ பகுதியில் டிப்பர் ரக வாகனமொன்றும் பேருந்து ஒன்றும் நேருக்கு நேர் மோதி விபத்துக்குள்ளானதில் ஐந்து பேர் காயமடைந்துள்ளனர்.
விபத்தில் காயமடைந்தவர்கள் சிகிச்சைக்காக கராப்பிட்டிய வைத்தியசாலையில் அனுமதிக்கப்பட்டுள்ளதாகத் தெரிவிக்கப்படுகிறது.
குறித்த டிப்பர் ரக வாகனம் வேறு ஒரு வாகனத்தை முந்திச் செல்ல முயன்றபோதே, எதிரே வந்த பேருந்துடன் மோதி இந்த விபத்து சம்பவித்துள்ளதாகப் பொலிஸார் தெரிவித்துள்ளனர்.
சம்பவம் தொடர்பில் அஹங்கம பொலிஸார் மேலதிக விசாரணைகளை மேற்கொண்டு வருகின்றனர்.
இனவாதத்துக்கு எதிரான கொள்கையிலிருந்து ஐக்கிய மக்கள் சக்தி விலகினால் கட்சியில் நீடிக்கமாட்டேன் – முஜிபுர் ரஹ்மான்
சிறுபான்மை மக்களின் உரிமைகளை பாதுகாப்பது இனவாதத்துக்கு எதிராக செயற்படுவதே ஐக்கிய மக்கள் சக்தியின் கொள்கையாகும். இந்த கொள்கைக்கு எதிராக கட்சி செயற்படுமாக இருந்தால் ஐக்கிய மக்கள் சக்தியில் தொடந்து இருக்கப்போவதில்லை என ஐக்கிய மக்கள் சக்தி பாராளுமன்ற உறுப்பினர் முஜிபுர் ரஹ்மான் தெரிவித்தார்.
எமது ஷார்ட் நியூஸ் ஊடகத்திட்கு அவர் வழங்கிய நேர்காணல் ஒன்றின்போதே இவ்வாறு தெரிவித்தார்.
அவர் அங்கு தொடர்ந்து குறிப்பிடுகையில்,
ஐக்கிய மக்கள் சக்தியின் சிரேஷ்ட உறுப்பினராக லக்ஷ்மன் கிரியெல்ல மகாநாயக்க தேரர்களை சந்தித்த பின்னர் ஊடகங்களுக்கு தெரிவித்த கருத்து, ஐக்கிய மக்கள் சக்தியின் கருத்து அல்ல. அது அவரின் தனிப்பட்ட கருத்தாகும். அதனை கட்சியின் தலைமையோ நாங்களோ ஏற்றுக்கொள்ளப்போவதில்லை. அவரது கருத்து உண்மையில் தெரிவிக்கக் கூடாது ஒரு கருத்தாகும். அவர் இவ்வாறு தெரிவித்த கருத்து எனக்கும் ஆச்சரியமாகவே இருந்தது. ஏனெனில் அவர் கொவிட் காலத்தில் முஸ்லிம் மக்களுக்கு எதிராக மேற்கொள்ளப்பட்ட விடயங்கள், ரிஷாத் பதியுதீனுக்கு கோட்டாபய அரசாங்கத்தில் மேற்கொள்ளப்பட்ட அநீதிகளுக்கு எதிராக, இவ்வாறு சிறுபான்மை மக்களுக்கு ஏற்படும் அநீதிகளுக்கு எதிராக தொடர்ந்து குரல்கொடுத்துவரும் ஒருவர்.
எவ்வாறு இருந்தாலும் தற்போது அவர் தெரிவித்திருந்த விடயம் பிழையான கருத்தாகும். கட்சியின் உயர் பீடம் இன்னும் சில தினங்களில் கூட இருக்கிறது. அப்போது இந்த விடயம் தொடர்பாகவும் நாங்கள் பேச இருக்கிறோம். எதிர்காலத்தில் இவ்வாறான கருத்துக்கள் தெரிவிப்பதை தவிர்த்துக்கொள்ள வேண்டும் என்பதை நாங்கள் தெரிவிப்போம். அதேநேரம் லக்ஷ்மன் கிரியெல்ல தெரிவித்த கருத்து தொடர்பில் நான் பகிரங்கமாக எதிர்ப்பு தெரிவிக்கவில்லை. ஏனெனில் எமது கட்சிக்கு என ஒழுக்க நெறி ஒன்று இருக்கிறது. அதன் பிரகாரம் கட்சியின் உள் விவகாரம் தொடர்பில் கட்சிக்குள் கதைத்து, தீர்வு காண நடவடிக்கை எடுத்தோம்.
ஆனால் கட்சி அது தொடர்பில் நடவடிக்கை எடுக்காமல் இருந்திருந்தால்,, அது தொடர்பில் நாங்கள் வெளியில் கதைத்திருப்போம். ஆனால் அதன் பின்னர் லக்ஷ்மன் கிரியெல்ல அது தொடர்பில் எங்கும் கருத்து தெரிவிக்கவில்லை. அவ்வாறு கட்சி கொள்கைக்கு மாறாக கருத்து தெரிிவித்திருந்தால், நாங்கள் பகிரங்கமாக கருத்து தெரிவித்திருப்பாேம். ஏனெனில் இந்த நாட்டில் இனவாதத்தை ஒழிக்க வேண்டும். முஸ்லிம் சமூகத்தின் உரிமைகள் பாதுகாக்கப்படவேண்டும். அனைத்து இனங்களுடன் ஒற்றுமையாக செயற்பட வேண்டும் என்ற நோக்கத்திலே நாங்கள் ஐக்கிய மக்கள் சக்தியுடன் இருக்கிறோம். ஐக்கிய மக்கள் சக்தியின் கொள்கையும் அதுதான்.
எனவே ஐக்கிய மக்கள் சக்தி இந்த கொள்கைக்கு எதிராக செயற்படுமாக இருந்தால், அப்போது நாங்கள் ஐக்கிய மக்கள் சக்தியில் தொடர்ந்து இருக்கப்போவதில்லை. ஏனெனில் இந்த அரசியல் கட்சிகள் எதுவும் எமக்கு மதம் அல்ல. தொடர்ந்து அந்த கட்சியில்தான் இருக்க வேண்டும் என்றில்லை. முஸ்லிம் சமூகத்தின் எதிர்காலம் உரிமைகளை பாதுகாக்கவே நாங்கள் அரசியலில் பிரதிநிதித்துவம் செய்துவருகிறோம் என்றார்.
எழுத்து - (எம்.ஆர்.எம்.வசீம்)
களுத்துறை இரட்டைக் கொலை சம்பவம் ; துப்பாக்கிதாரி கைது!
களுத்துறை, நாகொட பகுதியில் உணவக உரிமையாளர் மற்றும் அவரது மனைவி சுட்டுக் கொல்லப்பட்ட சம்பவத்துடன் தொடர்புடையதாகச் சந்தேகிக்கப்படும் முக்கிய துப்பாக்கிதாரி, களுத்துறை குற்றத்தடுப்புப் பிரிவினரால் கைது செய்யப்பட்டுள்ளார்.
கடுவலை, ரனல பகுதியில் உள்ள வீடொன்றில் பதுங்கியிருந்த நிலையிலேயே குறித்த சந்தேக நபர் கைது செய்யப்பட்டுள்ளதாகப் பொலிஸார் தெரிவித்தனர்.
கடந்த வெள்ளிக்கிழமை (09) நாகொடை பகுதியில் அமைந்துள்ள உணவகம் ஒன்றுக்கு முன்பாக இந்த துப்பாக்கிச் சூடு நடத்தப்பட்டது.
இந்தச் சம்பவத்தில் 54 வயதுடைய உணவக உரிமையாளர் சம்பவ இடத்திலேயே உயிரிழந்ததுடன், படுகாயமடைந்த அவரது மனைவி வைத்தியசாலைக்கு கொண்டு செல்லும் வழியில் உயிரிழந்தார்.
மோட்டார் சைக்கிளில் வந்த அடையாளம் தெரியாத இரண்டு நபர்கள் இந்தத் துப்பாக்கிச் சூட்டை நடத்திவிட்டுத் தப்பியோடியுள்ளனர். இதனைத் தொடர்ந்து பொலிஸார் தீவிர விசாரணைகளை முன்னெடுத்தனர்.
தொலைபேசி பகுப்பாய்வு அறிக்கைகள் மற்றும் சிசிரிவி காட்சிகளைப் பயன்படுத்தி நடத்தப்பட்ட விசாரணைகளின் மூலம், குற்றத்துடன் தொடர்புடைய முக்கிய துப்பாக்கிதாரி கடுவலை பகுதியில் தங்கியிருப்பது கண்டறியப்பட்டது. இதன் மூலம் களுத்துறை குற்றத்தடுப்புப் பிரிவு அதிகாரிகள் அவரை கைது செய்தனர்.
கைது செய்யப்பட்டவர் பதுளைப் பகுதியைச் சேர்ந்த 32 வயதுடைய நபர் ஆவார்.
ஒழுங்கமைக்கப்பட்ட குற்றக் கும்பல் உறுப்பினரான 'டிப்பிடிகொட சக்தி' என்பவரின் உறவினருக்குச் சொந்தமான வீட்டிலேயே இவர் பதுங்கியிருந்துள்ளார்.
'களுத்துறை நவீன்' எனப்படும் நபரின் உத்தரவுக்கு அமையவே இந்தத் துப்பாக்கிச் சூடு நடத்தப்பட்டுள்ளதாகத் தெரியவந்துள்ளது.
இந்தக் கொலையில் பயன்படுத்தப்பட்ட T-56 ரக துப்பாக்கி மற்றொருவரால் துப்பாக்கிதாரியிடம் வழங்கப்பட்டுள்ளது.
துப்பாக்கிச் சூட்டிற்குப் பின், அந்தத் துப்பாக்கி தெற்கு அதிவேக வீதியின் தொடாங்கொடை பரிமாற்றப் பகுதிக்கு அருகில் மற்றுமொரு நபரிடம் ஒப்படைக்கப்பட்டுள்ளது.
கைது செய்யப்பட்ட சந்தேக நபர் களுத்துறை நீதவான் நீதிமன்றத்தில் ஆஜர்படுத்தப்படவுள்ளார். இந்தச் சம்பவம் குறித்து பொலிஸார் மேலதிக விசாரணைகளைத் தொடர்ந்து நடத்தி வருகின்றனர்.
நீர்த்தேக்கங்களின் நீர்மட்டம் அதிகரிப்பு: வெள்ள அபாயம் இல்லை
இலங்கையில் நிலவும் சீரற்ற வானிலை காரணமாக நாட்டின் பல பாகங்களில் உள்ள நீர்த்தேக்கங்களின் நீர்மட்டம் சற்று அதிகரித்துள்ள போதிலும், இதுவரை எந்தவொரு இடத்திலும் வெள்ளப்பெருக்கு அபாயம் ஏற்படவில்லை என நீர்ப்பாசனத் திணைக்களம் தெரிவித்துள்ளது.
திணைக்களத்தின் நீரியல் மற்றும் அனர்த்த முகாமைத்துவப் பிரிவின் பணிப்பாளர் எல்.எஸ். சூரியபண்டார இது குறித்துத் கருத்துத் தெரிவிக்கையில், களு கங்கை மற்றும் களனி கங்கையில் சில பகுதிகளில் 50 தொடக்கம் 75 மில்லிமீற்றர் வரை மழை பதிவாகியுள்ளதால் நீர்மட்டம் சற்று உயர்ந்துள்ளதாகக் குறிப்பிட்டுள்ளார்.
எனினும், அது பெருவெள்ளம் ஏற்படும் அளவுக்கு இன்னும் அதிகரிக்கவில்லை என்றும், நில்வளா, கின்கங்கை, அத்தனுகலு ஓயா மற்றும் மா ஓயா உள்ளிட்ட ஏனைய நதிப் படுகைகளிலும் நீர்மட்டம் சாதாரண அளவிலேயே உயர்ந்துள்ளதாகவும் அவர் தெரிவித்தார்.
அதேவேளை, அநுராதபுரம், திருகோணமலை, புத்தளம் மற்றும் குருநாகல் ஆகிய மாவட்டங்களில் அதிக மழைவீழ்ச்சி பதிவாகி வருவதன் காரணமாகத் தெதரு ஓயா மற்றும் ராஜங்கனை நீர்த்தேக்கங்களின் வான் கதவுகள் திறக்கப்பட்டுள்ளன.
இதற்கமைய, தெதரு ஓயா நீர்த்தேக்கத்திலிருந்து வினாடிக்கு 5,300 கன அடி நீரும், ராஜங்கனை நீர்த்தேக்கத்திலிருந்து வினாடிக்கு 2,300 கன அடி நீரும் திறக்கப்பட்டு வெளியேற்றப்பட்டு வருகின்றன.
எதிர்வரும் நாட்களில் நாட்டின் தென்மேற்குப் பிரதேசங்களில் பலத்த மழை பெய்யக்கூடும் என எதிர்பார்க்கப்படுவதால், குறிப்பாக யாழ்ப்பாணம் மற்றும் மன்னார் போன்ற மாவட்டங்களில் திடீரெனப் பெய்யும் பலத்த மழையினால் தாழ்நிலப் பகுதிகள் நீரில் மூழ்கும் வாய்ப்புள்ளது.
எனவே, நாட்டின் பல பாகங்களிலும் உள்ள ஆறுகள் மற்றும் தாழ்நிலப் பகுதிகளுக்கு அருகில் வசிக்கும் பொதுமக்கள் இது குறித்து அவதானத்துடன் செயற்படுமாறு நீர்ப்பாசனத் திணைக்களம் கேட்டுக்கொண்டுள்ளது.
இலங்கையின் பல பாகங்களில் பலத்த மழை பெய்யக்கூடும்
வங்கக்கடலில் உருவான காற்றழுத்த தாழ்வு மண்டலம் தீவிரமடைந்துள்ளதாகவும், இதன் செல்வாக்கு காரணமாக இலங்கையின் பல பாகங்களில் பலத்த மழை பெய்யக்கூடும் என்றும் வளிமண்டலவியல் திணைக்களம் எதிர்வுகூறியுள்ளது.
மத்திய கிழக்கு மற்றும் அதனை ஒட்டிய தென்கிழக்கு வங்கக்கடல் பகுதியில் நிலவிய காற்றழுத்த தாழ்வு மண்டலம் தற்போது தீவிர காற்றழுத்த தாழ்வு மண்டலமாக வலுப்பெற்றுள்ளது. இது மேற்கு திசை நோக்கி நகர்ந்து, வட அகலாங்கு 15.3° மற்றும் கிழக்கு நெட்டாங்கு 89.7° பகுதியில் மையம் கொண்டுள்ளது.
இந்த தொகுதி மேலும் மேற்கு நோக்கி நகர்ந்து, இன்றைய தினத்துக்குள் (26) சூறாவளியாக உருவெடுக்கக் கூடும். தொடர்ந்து மேற்கு-வடமேற்கு திசையில் நகர்ந்து, நாளை (27) தீவிர சூறாவளியாக வலுவடையும் என எதிர்பார்க்கப்படுகிறது.
இந்த அமைப்பு இலங்கையை நேரடியாகப் பாதிக்காது என்றபோதிலும், இதன் காற்று சுழற்சி தீவு முழுவதும் பரவுவதால் நாட்டின் தென்மேற்கு பகுதிகளில் எதிர்வரும் சில நாட்களுக்கு மழை அதிகரிக்கக்கூடும்.
வடக்கு, மேல், சப்ரகமுவ, தென், வடமேல், மத்திய மற்றும் வடமத்திய மாகாணங்களிலும் திருகோணமலை மாவட்டத்திலும் அவ்வப்போது மழை அல்லது இடியுடன் கூடிய மழை பெய்யக்கூடும். சில இடங்களில் 100 மில்லிமீற்றருக்கும் அதிகமான பலத்த மழை பெய்ய வாய்ப்புள்ளது.
ஊவா மாகாணத்திலும் அம்பாறை மற்றும் மட்டக்களப்பு மாவட்டங்களிலும் பிற்பகல் 1.00 மணிக்குக்குப் பின்னர் பல இடங்களில் மழையோ அல்லது இடியுடன் கூடிய மழையோ பெய்யக்கூடும்.
மத்திய மலைநாட்டின் மேற்கு சரிவுகளிலும், வடக்கு, வடமத்திய, வடமேல் மாகாணங்களிலும் திருகோணமலை மற்றும் ஹம்பாந்தோட்டை மாவட்டங்களிலும் இடைக்கிடையே மணிக்கு 40-50 கிலோமீற்றர் வேகத்தில் பலத்த காற்று வீசக்கூடும்.
இடியுடன் கூடிய மழை பெய்யும் வேளைகளில் தற்காலிகமாக வீசக்கூடிய பலத்த காற்று மற்றும் மின்னல் தாக்கங்களினால் ஏற்படக்கூடிய பாதிப்புகளை குறைத்துக்கொள்ள தேவையான முன்னெச்சரிக்கை நடவடிக்கைகளை எடுக்குமாறு பொதுமக்கள் கேட்டுக்கொள்ளப்படுகிறார்கள்.
பயங்கரவாதத் தடுப்பு மற்றும் ஒழுங்கமைக்கப்பட்ட குற்றத் தடுப்பு சட்டமூலங்களை நிராகரித்தது கம்யூனிஸ்ட் கட்சி
(எம்.ஆர்.எம்.வசீம்)
பயங்கரவாதத்தில் இருந்து அரசை பாதுகாக்கும் சட்டம் மற்றும் ஒழுங்கமைக்கப்பட்ட குற்றங்களைத் தடுக்கும் ஆகிய இரண்டு சட்டமூலங்களும் நாட்டு மக்களின் அடிப்படை உரிமை மற்றும் சுதந்திரத்துக்கு பாரிய அச்சிறுத்தலாகும். அதனால் இலங்கை கம்யூனிஸ்ட் கட்சி, இந்த இரண்டு சட்டமூலங்களையும் வன்மையாக நிராகரிக்கிறது என சிறிலங்கா கம்யூனிஸ்ட் கட்சி தெரிவித்துள்ளது
இது தொடர்பாக சிறிலங்கா கம்யூனிஸ்ட் கட்சியின் செயலாளர் வைத்தியர் ஜீ.வீரசிங்க விடுத்துள்ள அறிக்கையில் மேலும் தெரிவிக்கப்பட்டுள்ளதாவது,
பயங்கரவாதத்தில் இருந்து அரசை பாதுகாக்கும் சட்டம் மற்றும் ஒழுங்கமைக்கப்பட்ட குற்றங்களைத் தடுக்கும் ஆகிய இந்தச் சட்டமூலங்கள் இரண்டும் ஒன்றாகச் சேரும்போது, ஜனநாயகம், அடிப்படை உரிமைகள் மற்றும் இலங்கை மக்களுக்கு உறுதிப்படுத்தப்பட்டுள்ள சுதந்திரத்திற்கு கடுமையான அச்சுறுத்தலை ஏற்படுத்துகின்றன. இந்தச் சட்டமூலங்கள் மூலம் அரசாங்கத்திற்கு கிடைக்கப்பெறும் புதிய அதிகாரங்கள், மக்கள் மீது சர்வாதிகார ஆட்சியை நிறுவப் பயன்படுத்தப்படும் என்ற அச்சம் நிலவுகிறது.
நாட்டின் வடக்கு மற்றும் கிழக்கு மாகாணங்களில் நிலவிய நீண்டகால உள்நாட்டு மோதல்களின் போதும், 1987-90 காலப்பகுதியில் தெற்கில் நிலவிய பயங்கரவாதக் காலத்தின் போதும், பயங்கரவாதக் கொலையாளிகளின் துன்புறுத்தல்களுக்கு இலங்கை கம்யூனிஸ்ட் கட்சியும் முகங்கொடுத்துள்ளது. எனவே, பயங்கரவாதம், ஒழுங்கமைக்கப்பட்ட குற்றச் செயல்கள் மற்றும் பொதுப் பாதுகாப்பிற்கு ஏற்படும் அச்சுறுத்தல்களை முறியடிக்க வேண்டிய அவசியத்தை எமது கட்சி நன்றாகப் புரிந்துகொண்டுள்ளது.
இருப்பினும், 1983 ஆம் ஆண்டில் ஆளுங்கட்சியினால் கட்டவிழ்த்துவிடப்பட்ட இனவாதத் தாக்குதல்களுக்குப் பின்னால் கம்யூனிஸ்ட் கட்சி இருப்பதாக பொய்க் குற்றச்சாட்டுகளைச் சுமத்தி, அன்றைய அரசாங்கம் அக்கட்சியை தடை செய்யவும் அதன் தலைவர்களை சிறையில் அடைக்கவும் நடவடிக்கை எடுத்தது. எனவே, ஜனநாயக எதிர்ப்பைக் கட்டுப்படுத்தவும், சமூக இயக்கங்களை அடக்கவும் அல்லது பிரஜைகளின் அரசியலமைப்பு உரிமைகளைப் பலவீனப்படுத்தவும் சட்டத்தை ஒரு கருவியாகப் பயன்படுத்துவதற்கு அரசாங்கத்திற்கு ஒருபோதும் இடமளிக்கக் கூடாது.
இந்தச் சட்டமூலங்களில் உள்ள பரந்த அதிகாரங்களும் ஏற்பாடுகளும், தற்போதுள்ள சட்டங்கள் அல்லது ஒழுங்குவிதிகளின் சில ஏற்பாடுகளை பலவீனப்படுத்தவோ அல்லது ரத்து செய்யவோ வழிவகுக்கலாம். இதன் மூலம் சட்டத்தை முறைகேடாகப் பயன்படுத்துவதற்கும் தன்னிச்சையாக செயல்படுத்துவதற்கும் கடுமையான ஆபத்து எழக்கூடும்.
குறிப்பாக, சிறிய தவறுகள் கூட குற்றங்களாகப் பெயரிடுதல், கருத்துச் சுதந்திரத்திற்கு (ஊடக அறிக்கையிடல் மற்றும் சில வேளைகளில் உடலில் பச்சைக் குத்துதல் போன்றவையும் உட்பட) அச்சுறுத்தல் ஏற்படுதல், நிரைவேற்று அதிகாரம் அளவுக்குமீறி விரிவடைதல் மற்றும் தடுத்துவைத்தல், பிணை வழங்குதல், ஒப்புதல் வாக்குமூலம் பெறுதல் தொடர்பான நிபந்தனைகளை மாற்றுதல் போன்ற விரிவான ஏற்பாடுகள் மிகுந்த கவலையை அளிக்கின்றன.
பயங்கரவாதம் மற்றும் ஒழுங்கமைக்கப்பட்ட குற்றங்களை ஒடுக்குவதற்கு தற்போதுள்ள சட்டங்களும் நிறுவனங்களும் போதாது என்பது இன்னும் நிரூபிக்கப்படவில்லை. அப்படி நிரூபிக்கப்படாத நிலையில், தடுத்துவைத்தல், பிணை நிபந்தனைகள், ஒப்புதல் வாக்குமூலங்கள் மற்றும் கருத்துச் சுதந்திரம் தொடர்பாக அரச அதிகாரங்களை விரிவுபடுத்த பரிந்துரைக்கப்பட்டிருப்பது தேவையற்றது, சமமற்றது மற்றும் ஜனநாயக சுதந்திரத்திற்கு தீங்கு விளைவிக்கக்கூடிய ஒரு படியாகும்.
நாட்டைப் பாதுகாத்தல் அல்லது பொது அமைதியைப் பேணுதல் என்ற பெயரில் அசாதாரண அதிகாரங்களைக் கோரும் சந்தர்ப்பங்களில் மிக விழிப்புடன் இருக்க வேண்டும் என்பதற்கு இலங்கையின் கடந்தகால பாதுகாப்புச் சட்டங்கள் தொடர்பான அனுபவங்கள் சாட்சியமளிக்கின்றன.தீவுகள் ஆராயுங்கள்
ஜனநாயகம், சமூக நீதி, தேசிய இறையாண்மை மற்றும் மக்களின் உரிமைகளைப் பாதுகாப்பதில் அர்ப்பணிப்புடன் செயற்படும் அனைத்துத் தரப்பினருடனும் இணைந்து செயற்பட சிறிலங்கா கம்யூனிஸ்ட் கட்சி அர்ப்பணித்து செயற்ட தயாராக இருக்கிறது. எனவே ஜனநாயக சுதந்திரத்தையும் அடிப்படை உரிமைகளையும் பாதுகாப்பதற்காக ஒன்றிணையுமாறு அனைத்து முற்போக்கு அரசியல் சக்திகள், ஜனநாயக அமைப்புகள், தொழிற்சங்கங்கள், இளைஞர் மற்றும் மாணவர் இயக்கங்கள் அத்துடன் இது குறித்து கவனம் செலுத்தும் பிரஜைகளிடம் நாங்கள் கேட்டுக்கொள்கிறோம். தேசிய பாதுகாப்பை பாதுகாத்தல், எப்போதுமே சிவில் சுதந்திரத்தைக் குறைப்பதற்கோ அல்லது சட்டபூர்வமான ஜனநாயக நடவடிக்கைகளை அடக்குவதற்கோ ஒருபோதும் சாட்டாக அமையக்கூடாது.
பொலிஸாரின் துப்பாக்கிச் சூட்டில் முச்சக்கர வண்டி சாரதி காயம்!
தங்களின் கட்டளையை மீறிச் சென்ற முச்சக்கர வண்டி மீது களுத்துறை, நாகொட பகுதியில் பொலிஸார் நடத்திய துப்பாக்கிச் சூட்டில் ஒருவர் காயமடைந்துள்ளார்.
களுத்துறை குற்றத்தடுப்புப் பிரிவு பொலிஸ் குழுவினர், களுத்துறை போபுவல பகுதியில் சந்தேகத்திற்கிடமான முச்சக்கர வண்டி ஒன்றை நிறுத்துமாறு சமிக்ஞை காட்டியுள்ளனர்.
எனினும், பொலிஸாரின் கட்டளையைப் புறக்கணித்து முச்சக்கர வண்டி நிறுத்தப்படாமல் அதிவேகமாகச் சென்றுள்ளது.
இதனைத் தொடர்ந்து, குறித்த முச்சக்கர வண்டியை சுமார் 4 கிலோமீற்றர் தூரம் துரத்திச் சென்ற பொலிஸார், நாகொட பகுதியில் வைத்து அதன் மீது துப்பாக்கிச் சூடு நடத்தியுள்ளனர்.
இந்தத் துப்பாக்கிச் சூட்டில் முச்சக்கர வண்டியின் சாரதி காயமடைந்ததுடன், அவர் மேலதிக சிகிச்சைக்காக நாகொட போதனா வைத்தியசாலையில் அனுமதிக்கப்பட்டுள்ளார்.
சம்பவத்தில் காயமடைந்தவர் களுத்துறை ரஜவத்த பகுதியைச் சேர்ந்த திட்டமிட்ட குற்றக்குழு உறுப்பினர் என கருதப்படும் 'ரஜவத்த சஞ்சு' என்பவர் என அடையாளம் காணப்பட்டுள்ளார்.
குறித்த முச்சக்கர வண்டியைப் பரிசோதித்தபோது அதிலிருந்து போதைப்பொருட்கள் கைப்பற்றப்பட்டதாக பொலிஸார் தெரிவித்தனர்.
இச்சம்பவம் தொடர்பில் களுத்துறை பொலிஸார் மேலதிக விசாரணைகளை மேற்கொண்டு வருகின்றனர்.
“ஆரம்பத்தில் சர்வதேச நாணய நிதியத் திட்டத்தை விரும்பவில்லை” – பிரதமர் ஹரிணி
(நமது நிருபர்)
ஆரம்பத்தில் நாங்கள் சர்வதேச நாணய நிதியத்தின் திட்டத்தை விரும்பவில்லை, அதில் தயக்கத்தை காட்டினோம். ஆனால் பின்னர் அத்திட்டத்தை பின்பற்ற வேண்டிய கட்டாயம் ஏற்பட்டது என்று பிரதமர் கலாநிதி ஹரிணி அமரசூரிய தெரிவித்தார்.
ஈரானை மையமாகக் கொண்டு நிலவும் போர்கள் எவருக்கும் எந்த நன்மையும் அளிக்காது. இலங்கையைப் பொறுத்தவரையில் பிராந்திய அமைதியைப் பாதுகாத்தல், கடல்சார் பாதுகாப்பை உறுதிப்படுத்தல் மற்றும் பொருளாதாரச் சுமையை எதிர்கொள்ளல் ஆகிய விடயங்களுக்கு முன்னுரிமை அளித்து நடுநிலையாக உள்ளது என்றும் அவர் வலியுறுத்தியுள்ளார்.
சர்வதேச ஊடகமான சி.என்.என் செய்திச் சேவைக்கு வழங்கிய நேர்காணலின் போதே மேற்கண்டவாறு தெரிவித்துள்ளார். அதில் அவர் மேலும் தெரிவித்துள்ளதாவது,
இலங்கையைச் சுற்றியுள்ள கடற்பரப்புக்களில் மோதல்கள் பரவக்கூடும் என்ற சிறப்புக் கவலை காணப்படுகின்றது. இந்நிலையில் இலங்கை இந்த மோதலில்; நடுநிலையான நிலைப்பாட்டைப் பேணி வருகிறது. இலங்கையின் மூலோபாய கடல்சார் அமைவிடத்தைக் கருத்திற்கொண்டு, பிராந்திய ஸ்திரத்தன்மையை உறுதி செய்வதும், நாட்டின் பிராந்திய கடற்பரப்பு பகுதிக்குள் மோதல்கள் தாக்கத்தை ஏற்படுத்தாமல் தடுப்பதும் முக்கியமான முன்னுரிமை மிக்க விடயங்களாகும்.
எவ்வாறாயினும், கடுமையான பொருளாதார நெருக்கடியிலிருந்து மீண்டு வரும் பொருளாதாரத்தின் மீது அதிகரித்து வரும் எரிசக்திச் செலவுகள் கூடுதல் அழுத்தத்தைக் கொடுத்துள்ளதால், நாடு பொருளாதாரத் தாக்கத்திலிருந்து முழுமையாக வெளிவரமுடியாத நிலைமை ஏற்பட்டுள்ளது.
அதேநேரம், கடந்த பல ஆண்டுகளாக நாடு எதிர்கொண்ட சவால்களைக் கருத்திற்கொள்ளும்போது பொருளாதார ரீதியில் மிகச்சிறப்பாகச் செயற்பட்டு வருகின்றோம். நாங்கள் எவ்விதமான நிலைமைகளை எதிர்கொண்டு வந்தோம் என்பதைக் கருத்திற்கொள்ளும்போது மிகச்சிறப்பாகச் செயற்பட்டு வருகிறோம். நிதி முகாமை, சர்வதேச நாணய நிதியத்தின் திட்டத்திற்குக் கட்டுப்படுதல், ஊழல் மற்றும் விரயங்களை எதிர்த்துப் போராடும் முயற்சிகள் மற்றும் ஆளுகையில் செய்யப்பட்டுள்ள முன்னேற்றங்கள் ஆகியவையே இந்த முன்னேற்றத்திற்குக் காரணமாகின்றன.
சர்வதேச நாணய நிதியத்தின் திட்டத்தைப் பின்பற்றுவதில் ஆரம்பத்தில் தயக்கம் காட்டினோம். அதன் பின்னர் சர்வதேச நிதி நிறுவனத்துடன் இணைந்து செயற்படுவதற்கான சாத்தியக்கூறுகளை உணர்ந்துகொண்டோம். நாங்கள் சர்வதேச நாணய நிதியத்தின் திட்டத்தை விரும்பவில்லை, ஆனால் அதைப் பின்பற்ற வேண்டிய கட்டாயம் ஏற்பட்டது.
பொருளாதார ஸ்திரத்தன்மைக்கு முன்னுரிமை அளிக்கும் அதேவேளையில் அத்திட்டத்தின் சில நிபந்தனைகளுடன் அரசாங்கம் உடன்பட்டுள்ளது.இரண்டு ஆண்டுகளுக்குப் பிறகு இலங்கை ஸ்திரமான நிலையை அடைந்துள்ளது. இருப்பினும் அண்மைக்கால சர்வதேச நிகழ்வுகளால் ஏற்பட்டுள்ள வெளிப்புற அதிர்ச்சிகளுக்குப் பொருளாதாரம் எந்தளவிற்குப் பாதிக்கப்படக்கூடியது என்பதை உணர்ந்து கொள்ள வேண்டும் என்றார்.
பயங்கரவாதச் சட்டமூலங்கள் மூலம் மேலதிக அதிகாரங்களைப் பெற அரசு முயற்சி - வாசுதேவ நாணயக்கார
(க.சிவலிங்கமூர்த்தி)
அரசாங்கம் தேவைக்கு அதிகமாக அச்சமடைந்துள்ளதுடன், எதிர்காலத்தில் ஏகபோக மற்றும் எதேச்சதிகார ஆட்சியை முன்னெடுப்பதற்குத் தேவையான பின்னணியை உருவாக்கும் நோக்கில் புதிய பயங்கரவாத அடக்குமுறை சட்டமூலங்களின் ஊடாக மேலதிக அதிகாரங்களைத் தனது கைகளில் எடுத்துக்கொள்ள முயற்சிக்கின்றது என ஜனநாயக இடதுசாரி முன்னணியின் தலைவர் வாசுதேவ நாணயக்கார குற்றம்சாட்டினார்.
நாட்டில் கிளர்ச்சிகளோ, யுத்தமோ அல்லது அரசாங்கத்தால் கட்டுப்படுத்த முடியாத அளவிலான மக்கள் அமைதியின்மையோ இல்லாத நிலையில், மக்களின் அனைத்து வகையான சுதந்திரங்களையும் கட்டுப்படுத்தக்கூடிய கடுமையான ஜனநாயக விரோதச் சட்டமூலங்களை நிறைவேற்றுவதற்கு அரசாங்கம் முயற்சிப்பது அதன் பலவீனத்தையே வெளிப்படுத்துகின்றது என்றும் அவர் சுட்டிக்காட்டினார்.
கொழும்பிரல் நேற்று சனிக்கிழமை (24) நடைபெற்ற ஊடகவியலாளர் சந்திப்பில் கலந்துகொண்டு கருத்துத் தெரிவிக்கும்போதே அவர் மேற்கண்டவாறு தெரிவித்தார்.
அவர் அங்கு மேலும் தெரிவிக்கையில்,
அரசாங்கம் நிறைவேற்றுவதற்கு முயற்சிக்கும் கடுமையான ஜனநாயக விரோதச் சட்டமூலங்களுக்கு எவ்வித நியாயமும் இல்லை என்பதை இலங்கையும் சர்வதேச சமூகமும் நன்கு அறிந்துள்ளன. நாட்டில் கிளர்ச்சிகளோ, யுத்தமோ அல்லது கட்டுப்படுத்த முடியாத மக்கள் அமைதியின்மையோ இல்லாத நிலையில், மக்களின் சுதந்திரங்களை முடக்கக்கூடிய இத்தகைய சட்டமூலங்களை நிறைவேற்றுவதற்கு அரசாங்கம் முயற்சிப்பது அதன் பலவீனத்தையே எடுத்துக்காட்டுகின்றது.
இந்தச் சட்டமூலங்களுக்கு எதிராக இலங்கையின் பல்வேறு தரப்பினரும் சர்வதேச அமைப்புகளும் தமது அதிருப்தியை வெளிப்படுத்தியுள்ளன. விழிப்புணர்வுள்ள தொழில்முறை நிபுணர்கள், புத்திஜீவிகள் உள்ளிட்ட பல்வேறு தரப்பினர் இச்சட்டமூலங்களால் ஜனநாயகத்துக்கும் மக்களின் உரிமைகளுக்கும் ஏற்படக்கூடிய பாதிப்புகள் தொடர்பில் தமது எதிர்ப்பை வெளியிட்டுள்ளனர். அவற்றுக்கான காரணங்களையும் அவர்கள் தெளிவாக முன்வைத்துள்ளனர்.
இருப்பினும், இச்சட்டமூலங்கள் நாடாளுமன்றத்தில் நிறைவேற்றப்படுவதற்கான வாய்ப்புகள் உள்ளன. ஏனெனில், அரசாங்கத்திடம் மூன்றில் இரண்டு பெரும்பான்மையுடன் சட்டமூலங்களை நிறைவேற்றுவதற்குத் தேவையான நாடாளுமன்ற உறுப்பினர்களின் எண்ணிக்கை காணப்படுகின்றது.
இவ்வாறான சூழ்நிலையில், எதிர்க்கட்சியினரால் என்ன செய்ய முடியும் என்ற கேள்வி எழுகின்றது. நாடாளுமன்றத்தில் எதிர்ப்பை வெளிப்படுத்துவதும், சட்டமூலங்களால் ஏற்படக்கூடிய பாதிப்புகளைச் சுட்டிக்காட்டுவதும் மட்டுமே எதிர்க்கட்சியினரால் செய்யக்கூடியவையாக உள்ளன. அதற்கு அப்பால் அவர்களால் முன்னெடுக்கக்கூடிய நடவடிக்கைகள் மட்டுப்படுத்தப்பட்டுள்ளன
மக்களின் சுதந்திரத்தை முடக்குதல், ஜனநாயகத்தை ஒடுக்குதல் மற்றும் மக்களின் உரிமைகளைக் கட்டுப்படுத்துதல் போன்ற விடயங்களின் பாரதூரமான விளைவுகளைப் பொதுமக்கள் இன்னும் முழுமையாக உணரவில்லை. இதன் காரணமாகவே, இச்சட்டமூலங்களுக்கு எதிராகப் பரந்தளவிலான மக்கள் எதிர்ப்பு நாட்டில் உருவாகவில்லை.
இது மிகவும் ஆபத்தான நிலைமையாகும். இலங்கையின் வரலாற்றில் இதுவரை நிறைவேற்றப்படாத வகையிலான ஜனநாயக விரோத நிரந்தரச் சட்டத்தை நிறைவேற்றுவதற்கான நடவடிக்கையை தற்போதைய அரசாங்கமே முதன்முறையாக முன்னெடுக்கின்றது என்பது எனது கருத்தாகும்.
நான் 50 ஆண்டுகளுக்கும் மேலாக பாராளுமன்றத்தில் இருந்துள்ளேன். எனது நீண்டகால அரசியல் அனுபவத்தில் இத்தகைய ஜனநாயக விரோதச் சட்டத்தை நிறைவேற்றுவதற்கான முயற்சியை இதற்கு முன்னர் கண்டதில்லை.
அரசாங்கம் ஏன் இவ்வாறு செயற்படுகின்றது என்பது முக்கியமான கேள்வியாகும். அரசாங்கம் தேவைக்கு அதிகமாக அச்சமடைந்துள்ளது அல்லது எதிர்காலத்தில் ஏகபோக, எதேச்சதிகார ஆட்சியை முன்னெடுக்க எதிர்பார்க்கின்றது. அதற்குத் தேவையான பின்னணியை உருவாக்கும் நோக்கிலேயே புதிய சட்டமூலங்களின் ஊடாக மேலதிக அதிகாரங்களைத் தனது கைகளில் எடுத்துக்கொள்ள அரசாங்கம் முயற்சிக்கின்றது என்றார்.
95 ஒக்டேன் பெற்றோல் விலையை 20 ரூபாவால் அதிகரித்தது ஐ.ஓ.சி.
லங்கா ஐ.ஓ.சி நிறுவனம், 95 ஒக்டேன் பெற்றோலின் விலையை ஞாயிற்றுக்கிழமை (25) நள்ளிரவு முதல் அமுலுக்கு வரும் வகையில் லீற்றருக்கு 20 ரூபாவால் அதிகரித்துள்ளது.
இதன்படி, இதுவரை 475 ரூபாவுக்கு விற்பனை செய்யப்பட்டு வந்த 95 ஒக்டேன் பெற்றோல் லீற்றரின் புதிய விலை 495 ரூபாவாக உயர்த்தப்பட்டுள்ளது.
இதேவேளை சினோபெக் நிறுவனமும் 95 ஒக்டேன் பெற்றோலின் விலையை ஒரு லீற்றருக்கு 20 ரூபாவால் அதிகரித்துள்ளமை குறிப்பிடத்தக்கது.
