(செ.தேன்மொழி)
கைது செய்யப்பட்டுள்ள நாடாளுமன்ற உறுப்பினர் ரிஷாத் பதியுதீன் மற்றும் அவரது சகோதரர் ரியாஜ் பதியுதீன் ஆகியோர் 72 மணித்தியாலயம் தடுப்புக் காவலில் வைத்து விசாரணைக்கு உட்படுத்தப்பட்டுள்ளதாக பொலிஸ் ஊடகப் பேச்சாளர் பிரதி பொலிஸ்மா அதிபர் அஜித் ரோஹண தெரிவித்தார்.
அத்துடன் சந்தேக நபர்களை தொடர்ந்தும் 90 நாட்கள் தடுப்புக் காவலில் வைத்து விசாரணைக்கு உட்படுத்துவதற்கு எதிர்பார்த்துள்ளதாகவும் பிரதி பொலிஸ்மா அதிபர் அஜித்ரோஹண தெரிவித்தார்.
உயிர்த்தஞாயிறுதின தற்கொலைத் தாக்குதலுக்கு பின்னர் கொலையாளிகள் உயிரிழந்திருந்தாலும் அவர்களுக்கான உதவிகளை வழங்கிய நபர்கள் தொடர்பிலும் விசாரணை அதிகாரிகள் கவனம் செலுத்தியிருந்தனர். இந்நிலையில் தாக்குதலின் பின்னர் ஏற்பட்ட உயிரிழப்புகள் மற்றும் பாதிப்புகள் தொடர்பில் விசாரணைகள் மேற்கொள்ளப்பட்டதைப்போன்று, தாக்குதலுக்கு முன்னர் அதாவது 2017, 2018 ஆம் ஆண்டுகளில் இடம்பெற்ற பல்வேறு சம்பவங்கள் , அடிப்படைவாத செயற்பாடுகள் தொடர்பிலும் கவனம் செலுத்தப்பட்டன.
அதற்கமைய ஏற்கனவே 697 சந்தேக நபர்கள் கைது செய்யப்பட்டுள்ளனர். இந்நிலையில், கடந்த வியாழக்கிழமை குளியாபிட்டியில் மூவர் கைது செய்யப்பட்டனர். நேற்று நாடாளுமன்ற உறுப்பினர் ரிஷாத் பதியுதீன் மற்றும் அவரது சகோதரரும் கைது செய்யப்பட்டுள்ளனர். இவர்களுடன் ஏப்ரல் 21 தாக்குதல் தொடர்பில் இதுவரையில் 702 பேர் கைது செய்யப்பட்டுள்ளனர். இவர்களுள் 202 பேர் சிறை வைக்கப்பட்டுள்ளனர். பயங்கரவாத தடுப்பு பிரிவு , பயங்கரவாத விசாரணைப் பிரிவு மற்றும் குற்றப் புலனாய்வு பிரிவில் 83 பேர் தடுத்து வைத்து விசாரணைக்கு உட்படுத்தப்பட்டு வருகின்றனர்.
இவ்வாறு தடுத்து வைக்கப்பட்டுள்ள நபர்களில் பயங்கரவாதியான ஸஹ்ரான் ஹாஷிமின் மனைவி உள்ளிட்ட பயங்கரவாதிகளின் உறவினர்கள் பலரும் உள்ளடங்குகின்றனர். இதேவேளை ஸஹ்ரானின் ஆலோசனைக்கமைய கல்முனை, அக்கரைப்பற்று , ஒலுவில், ஹம்பாந்தோட்டை மற்றும் மூதூர் ஆகிய பகுதிகளி நாடத்தப்பட்டதாக கூறப்படும் அடிப்படைவாத வகுப்புகளில் கலந்துக் கொண்டவர்கள் தொடர்பிலும் விசாரணைகள் மேற்கொள்ளப்பட்டன.
தற்கொலைதாரிகளுக்கு உதவி வழங்கிய நபர்கள் தொடர்பிலும் விசாரணைகள் இடம்பெற்றன அவர்களுக்கு நிதி கிடைக்கப்பெற்ற விதம் தொடர்பிலும் இதன்போது விசாரணை அதிகாரிகள் கவனம் செலுத்தியிருந்தனர். அதற்கமைய கொலையாளிகளுக்கு சிலர் உதவி செய்துளளதாக தெரியவந்துள்ளது. தனிநபர்களின் சாட்சிகள், விசாரணையின் போது கிடைக்கப்பெற்ற சாட்சிகள் மற்றும் தொழிநுட்ப ரீதியிலான சாட்சிகள் ஊடாகவே இது தொடர்பில் தெரிய வந்தது. இதன்போது வங்கி கணக்குகள் மற்றும் இந்த கணக்குகளின் பண பரிமாற்றம் தொடர்பிலும் விசாரணை அதிகாரிகள் விசாரணைகளை முன்னெடுத்திருந்தனர்.
அதனடிப்படையிலேயே நாடாளுமன்ற உறுப்பினர் ரிஷாத் பதியுதீன் மற்றும் அவரது சகோதரன் ரியாஜ் பதியுதீனை குற்றப் புலனாய்வு திணைக்களம் மற்றும் பயங்கரவாத தடுப்பு பிரிவின் அதிகாரிகள் கைது செய்துள்ளனர். இவர்கள் தற்போது பயங்கரவாத தடுப்பு பிவினரால் தடுத்து வைத்து விசாரணைக்கு உட்படுத்தப்பட்டு வருகின்றனர்.
979 இலக்கம் 48 இல் குறிப்பிடப்பட்டுள்ள பயங்கரவாத தடுப்பு சட்டத்தின் சட்டவிதிகளின் கீழ் , ஒருவர் கைது செய்யப்பட்டால் அவரை தடுப்புகாவலில் வைத்து விசாரணைக்கு உட்படுத்துவதற்காக அதிகாரிகளால் அனுமதியைப் பெற்றுக் கொள்ள முடியும். அதற்கமைய சந்தேக நபர்களை 72 மணித்தியாலயம் தடுப்புகாவலில் வைத்து விசாரணைக்கு உட்படுத்த முடியும். பயங்கரவாத தடைச் சட்டத்தில் 6:1 சரத்துக்கமைய 72 மணித்தியாலய தடுப்புகாவல் உத்தரவு பெற்றுக் கொள்ளப்பட்டுள்ளதுடன் அதற்கமைய அவர்கள் விசாரணைக்கு உட்படுத்தப்பட்டு வருகின்றனர்.
இந்த விசாரணைகளை தொடர்ந்தும் முன்னெடுப்பதற்காக பயங்கரவாத தடுப்புச் சட்டத்தின் 9:1 சரத்தின் கீழ் 90 நாட்கள் தடுப்பு காவலில் வைத்து விசாரணைக்கு உட்படுத்தவும் அனுமதி பெற்றுக் கொள்ள முடியும். அது தொடர்பிலும் விசாரணை அதிகாரிகள் கவனம் செலுத்தியுள்ளனர். இந்நிலையில் குற்றச் செயற்பாடுகளில் ஈடுபடும் ஒருவருக்கு உதவி, ஒத்தாசைகள் புரிபவர்களை பயங்கரவாத தடைச் சட்டம் மற்றும் குற்றவியல் சட்டத்தின் கீழ் கைது செய்வதற்கு அனுமதியுள்ளது.
கேள்வி : உயிர்த்த ஞாயிறுதின தற்கொலைத் குண்டுதாக்குதல் தொடர்பில் பொலிஸார் முறையாக விசாரணைகளை மேற்கொள்ளவில்லை என்று நாடாளுமன்றத்தில் குற்றச்சாட்டுகள் முன்வைக்கப்பட்டிருந்தன. இது தொடர்பில் உங்களது கருத்து?
பதில்: இந்தக் தற்கொலை குண்டுத் தாக்குதல் தொடர்பில் முன்னெடுக்கப்படும் விசாரணைகளுக்கமையவே 702 பேர் வரை கைது செய்யப்பட்டுள்ளனர். இந்நிலையில் பல்வேறு இடங்களில் பல்வேறு நபர்களால் பல கருத்துகள் கூறப்படலாம்.
இவ்வாறு கருத்து தெரிவிப்பவர்களை பயங்கரவாத விசாரணைப் பிரிவு , பயங்கரவாத தடுப்பு பிரிவு அல்லது குற்றப் புலனாய்வு பிரிவில் வந்து வாக்குமூலம் வழங்குமாறு கேட்டுக் கொள்கின்றேன். அப்போது அது தொடர்பில் நடவடிக்கை எடுக்க முடியும்.
