ஹட்டன் வர்த்தக நிலையங்கள் மீண்டும் திறப்பு- ‎சுகாதார பரிசோதகர்களுடன் கருத்து முரண்பாடு.

தனிமைப்படுத்தல் சட்டத்திற்கு அமைவாக தனிமைப்படுத்தப்பட்ட பகுதியாக ‎அறிவிக்கப்பட்டிருந்த ஹட்டன் நகரில் உள்ள அனைத்து விற்பனை ‎நிலையங்களையும் இன்று (31) தொடக்கம் மீண்டும் திறக்கப்படுவதாக ஹட்டன்-‎டிக்கோயா நகரசபை தலைவர் சடையன் பாலச்சந்திரன் ஆலோசனை ‎வழங்கியுள்ளார்.
‎
கடந்த 27ஆம் திகதி கொவிட் 19 வைரஸ் தொற்றுக்குள்ளான 11 பேர் ‎அடையாளம் காணப்பட்டதை தொடர்ந்து ஹட்டன் நகரம் தனிமைப்படுத்தப்பட்ட ‎பகுதியாக அறிவிக்கப்பட்டது.
‎
எவ்வாறாயினும், கடந்த காலங்களில் கொரோனா தொற்றாளர்களாக ‎அடையாளம் காணப்பட்டவர்கள் பணியாற்றியிருந்த ஹட்டன் பொதுச் சந்தை ‎வளாகத்தில் உள்ள கடைகள் அனைத்தையும் அதன் உரிமையாளர்கள் ‎அனுமதியின்றி திறந்துள்ளதாக தெரிவிக்கப்படுகிறது.
‎
இதன்போது, குறித்த பொதுச் சந்தை வளாகத்தை மூடுவதற்கு ஆலோசனை ‎வழங்கச் சென்ற ஹட்டன்-டிக்கோயா நகரசபையின் பொது சுகாதார ‎பரிசோதகர்களுக்கும் வியாபாரிகளுக்கும் இடையில் கருத்து முரண்பாடுகள் ‎ஏற்பட்டதாக தெரிவிக்கப்படுகிறது.
‎
இதன்போது, மறு அறிவித்தல் வரை கடைகளை திறக்க வேண்டாமென பொது ‎சுகாதார பரிசோதகர்கள் இதன்போது கடுமையாக எச்சரித்துள்ளதாக ‎தெரிவிக்கப்படுகிறது.
‎
இந்நிலையில், ஹட்டன் நகரில் உள்ள பெரும்பாலான விற்பனை நிலையங்கள் ‎திறக்கப்பட்ட போதிலும் ஹட்டன் நகருக்கு வருகைத் தரும் மக்களின் ‎எண்ணிக்கை குறைந்த அளவிலேயே காணப்பட்டதாக எமது செய்தியாளர் ‎தெரிவித்தார். ‎